Ferðsluvanlukkur á prutli

Fyri hvønn koyrdan kilometur er tað umleið 10 ferðir vandameiri at koyra á prutli enn á súkklu. Hetta vísa donsk hagtøl.

 

Vanligastu vanlukkurnar á prutli

Danskar kanningar vísa, at flestallar vanlukkur við ungum prutlkoyrarum eru stakvanlukkur. Tað vil siga, at tað ikki eru aðriri partar í vanlukkuni enn prutlkoyrarin sjálvur. Helmingurin av stakvanlukkunum henda, tí prutlkoyrarin er ávirkaður av rúsdrekka. Hin helvtin hendir ofta, tí prutlkoyrarin er gáloysin og fer at slingra, ella koyrir alt ov skjótt og ikki megnar at reagera, tá til dømis hol er í vegnum ella einhvør forðing.

Eisini henda nøkur óhapp í vegakrossum, har prutlið veðrur rakt av bili ið skal snara. Og óhapp, har prutlkoyrarin brýtur sína víkiskyldu og koyrir út fyri bil.

Ferðin hevur stóra ávirkan á, hvussu stóran skaða ein fær. Tess meiri ferð, tess størri skaðar. Ringastu skaðarnir eru skaðar á høvdið. Brotin armur ella bein kunnu vaksa saman aftur, men ein løstaður heili kann ikki verða umvældur. Koyr tí altið í hjálmi - fyri tína skuld.

Eldri prutlkoyrarar eru lutfalsliga ofta í vanlukkum vegna rúsdrekkakoyring.

 

Rúsdrekka og prutl - ein vána samanseting

Ofta verður tosað um rúsdrekkakoyring í sambandi vil bilførarar sum sita við róður. Men rúsdrekkakoyring á prutli er tíverri ikki ókent.

Donsk tøl vísa, at í prutlvanlukkum, har onkur fær álvarsligt mein ella doyr, hevur prutlkoyrarin verið rúsdrekkaávirkaður í nærum 4. hvørjum føri.

Koyrir tú rúsávirkað/ur á prutli, er tað bæði ólógligt og vandamikið. Harumframt kanst tú fáa bót og missa rættin at koyra prutl. Koyrir túr rúsdrekkaávirkað/ur á prutli fleiri ferðir, kanst tú missa prutlið.

Promillumarkið fyri prutl er tað sama sum fyri bil: 0,2 promilla. Hevur tú drukkið ov nógv til at koyra bil, skalt tú eisini lata prutlið standa.