Heystið er av álvara komið og tað merkir eisini myrkari dagar.
Brúkið seinastu dagarnar av heystfrítíðini til at finna endurskinini fram. Soleiðis at øll í húskinum eru sjónlig í ferðsluni, tá skúlarnir byrja aftur mánadagin.
Hópin av endurskinum fáast til keyps ella púra ókeypis í bankum, hjá tryggingarfeløgum o.s.fr.
Summi endurskin kunnu smoyggjast um eina buksubrók ella ermu, onnur hanga leyst og aftur onnur kunnu festast á skógvarnar. Hav í huga, at endurskin um beinini eru góð, tí tey síggjast væl úr øllum ættum og eru í lyktahædd. Ansa eftir, at taskur, turriklæði o.a. ikki kemur fyri endurskinini. Eitt gott hugskot er at seta endurskin á taskur, barnavognar og hundin.
Vit hava altíð nøkur endurskin í RFF. Ver vælkomin á gátt.
Tvey ella tíggju sekund
Við at vera í endurskini minkar tú um vandan at verða ákoyrd/ur við umleið 85%. Tí við endurskini gerst tú munandi sjónligari í myrkri, sum økir merkisvert um trygdina, tí bilførarin fær stundir at bremsa, gerst tað neyðugt.
Uttan endurskin ert tú nústani sjónlig/ur á 25-30 metra fjarstøðu, meðan tú við endurskini sæst í myrkri á 140 metra fjarstøðu, tá bilførarin brúkar nærljós. Við fjarljósi sær bilførarin teg á 400 metra fjarstøðu. Í tættbygdum øki hevur bilførari við nærljósum og 50 km/t ferð tvey sekund at varnast teg, um tú ikki ert í endurskini. Við endurskini hevur bilførarin 10 sekund – í hesum høpi kann tað vera munurin millum lív og deyða. (Kelda: www.toi.no)