Pinkustólur - 0-13 KG (0-1 ÁR)

Bakvendur pinkustólur er tryggasta loysnin. Við bakvendum pinkustóli minkar tú munandi um vandan fyri skaða á háls og nakka á barninum, um bilurin er fyri frontalum samanstoyti.

Stødd og vekt

Barnið kann sita í pinkustóli, frá at tað er nýføtt. Les nýtsluvegleiðingina væl og virðiliga fyri at tryggja tær, at bæði barn og pinkustólur eru rætt spent. Barnið er vaksið úr pinkustólinum, tá høvdið kemur upp um kantin á stólinum, ella tá barnið vigar meira enn hámarkið, sum er merkt á stólinum. Hetta er vanliga, tá barnið er millum 8 og 13 mánaðir.

Isofix

Pinkustólurin kann spennast fastur við isofix-festi ella við trygdarbeltinum. Hevur bilurin isofix-festi, verður mælt til at nýta isofix-pinkustól, tí vandin fyri skeivari ísetan er minni.

Boxetta ella lyftnet

Tað eru eisini tvær aðrar góðkendar loysnir: Boxettan er eitt slag av pinkubarnalyftu við beltum, og lyftnet er til at spenna lyftina fasta. Men hvørgin teirra er eins trygg og pinkustólurin, m.a. tí at barnið liggur tvørt av ferðslukósini. Tí mæla vit til til at bara nýta hesar loysnir, um børnini hava serligan tørv, sum ger, at tey ikki kunnu nýta pinkustól, t.d. børn, sum eru fødd ov tíðliga. Tú kanst tosa við læknan ella heilsusystrina, um tú ivast.

Stoytkoddin skal vera óvirkin

Set ongantíð pinkubørn framman fyri ein virknan stoytkodda. Tað er ólógligt og kann vera lívshættisligt.

Tilráðingar

Keyp einans góðkenda útgerð og vel ein handil, har tú fært góða ráðgeving. Tak barn og bil við, so handilsfólkini kunnu vísa tær, hvussu tú brúkar útgerðina.

Barnastólur - 9-18 KG (9 MÐR.-4 ÁR)

Tá ið barnið er vorðið ov stórt til pinkustólin, skal tað brúka barnastól. Barnastólar eru at fáa framvendir og bakvendir.

Framvendur ella bakvendur

Vit mæla til at brúka bakvendan barnastól, til barnið er 3-4 ár. Bakvendur barnastólur er tryggari, tí barnið situr við bakinum frameftir. Vandin fyri skaða á háls og nakka minkar munandi við bakvendum barnastóli, um bilurin er fyri frontalum samanstoyti. Ein slíkur tekur eitt sindur meira pláss enn ein framvendur, men tað ber til í flestøllum bilum.

Les meira um bakvendan bilstól niðanfyri.

Isofix

Barnastólurin kann spennast fastur við isofix-festi ella við trygdarbeltinum. Hevur bilurin isofix-festi, mæla vit til at nýta isofix-barnastól, tí vandin fyri skeivari ísetan er minni.

Tað er bannað at hava eitt barn í bakvendum bilstóli framman fyri ein virknan stoytkodda. Situr barnið í framvendum barnastóli, mæla vit frá stoytkodda.

Tilráðingar

Kanningar vísa, at í meira enn triðja hvørjum føri er annaðhvørt bilstólur skeivt festur ella barnið skeivt íbundið. Les altíð nýtsluleiðbeiningina til bilstólin. Allir bilstólar kunnu ikki nýtast í øllum bilum, og bilstólarnir eru ofta bara góðkendir til ávís pláss í bilinum. Tí mást tú altíð tryggja tær, at bilstólurin hóskar til bilin.

Bilpúta við stólabaki - 15-36 KG (ÚR 4 ÁRUM)

Í 3-4 ára aldri eru børn flest vaksin úr barnastólinum, og tá er tíð at skifta til bilpútu við stólabaki. Bilpútan er ein hørð púta, sum lyftir barnið upp, soleiðis at trygdarbeltið liggur rætt um herðarnar og um mjadnarnar. Stólabakið verjir høvdið á barninum sum ein nakkastuðul og stuðlar høvdinum væl, um barnið sovnar. Stólabakið gevur harumframt síðuvernd.

Brúka bilpútu við stólabaki, til barnið er í minsta lagi 135 cm. Tá kann barnið nýta vanligt trygdarbelti, men vit mæla tó til at nýta bilpútu, til barnið er 150 cm høgt ella vigar 36 kg, um barnið situr betur á bilpútu enn uttan.

Hygg at filmi um trygga íbinding av børnum uml. 4-10 ár niðanfyri.

Bilpúta bert í trípunktsbelti

Bilpúta kann bert nýtast á setri við vanligum trygdarbelti (trípunktsbelti). Tað er ólógligt at nýta bilpútu saman við mjadnabelti (tveypunktsbelti).

Bilpútur eru eisini at fáa við isofix-festi. Hevur bilurin isofix-festi, mæla vit til at nýta eina isofix-bilpútu.

Tilráðingar

Trygdarbeltið skal vera stramt og liggja gjøgnum beltistýrið við økslina og undir smáu ørmunum á bilpútuni, sum halda trygdarbeltinum niður móti mjadnunum. Liggur trygdarbeltið tvørtur um búkin, er vandi fyri álvarsligum skaða á gøgn.

Børn yvir 135 cm

Tá barnið er 135 cm, hevur tað loyvi at nýta vanligt trygdarbelti, men mælt verður til at halda fram at nýta bilpútu við stólabaki, til barnið er 150 cm høgt ella vigar 36 kg, um barnið situr betri á bilpútu enn uttan. Skift bara til bilpútu uttan stólabak, um barnið er ov høgt til stólabakið, t.e., um høvdið fer upp um kantin.

Børn á framsetrinum

Einki lógarásett aldursmark er fyri, nær børn kunnu sita á framsetrinum, men vit mæla til, at børn eru í minsta lagi 140 cm og kunnu nýta vanligt trygdarbelti fyri at sita á framsetrinum við ein virknan stoytkodda. Vit mæla eisini til at draga stólin heilt aftur, so at frástøðan til stoytkoddan er stór.

Tilráðing

Lat ongantíð barnið smoyggja skákbeltið undir armin ella aftur um bak. Tað kann vera lívshættisligt í samanstoyti.

Í bakvendum bilstóli

Tá barnið situr í bakvendum bilstóli, verða kroppur og høvd trýst ímóti stólabakinum í einum frontalum samanstoyti. Megin frá samanstoytinum verður javnað út á ein størri flata, so trýstið verður minni. Høvd og nakki fáa lítlan og ongan baksláttur.

Í framvendum bilstóli

Tá barnið situr í framvendum bilstóli, verður rørslan í nakka og høvdi stór í frontalum samanstoyti, tí høvdið verður slongt fram, samstundis sum trygdarbeltið heldur kroppinum føstum í bilstólinum. Nakkavøddarnir kunnu toyggjast so mikið, at barnið fær varandi mein. Barnið fær eisini ein harðan baksláttur við nýggjum trýsti á nakka og høvd.

Talvan niðanfyri vísir, hvørja skaðafyribyrgjandi ávirkan ymsu loysnirnar við trygdarbelti hava sammett við at sita óbundin.

Ávirkan við ymsum trygdarskipanum

Bakvendur bilstólur 90-95 % Framvendur bilstólur/bilpúta 50-60 % Trygdarbelti (einsamalt) hjá børnum undir 10 ár 20-30 % Trygdarbelti hjá vaksnum 50-60 %

Kobla stoytkoddan frá

Tað er ólógligt og lívshættisligt at hava ein bakvendan bilstól við ein virknan stoytkodda. Tí skal stoytkoddin altíð vera koblaður frá, um ein bakvendur bilstólur stendur á einum setri við stoytkodda. Kann stoytkoddin ikki koblast frá, skal bakvendi bilstólurin á baksetrið.