Útgerð á súkkluni

Kannar tú súkkluna við jøvnum millumbilum? Súkklur skulu verða útgjørdar, bæði so tær er lógligar, men eisini so tú ella barnið kunnu súkkla trygt.

Lyktir: Baklyktin skal lýsa reytt. Framlyktin skal lýsa bjart hvítt ella bláligt. Baklykt og framlykt kunnu blinka, men tær skulu síggjast úr 300 metra fjarstøðu umframt frá síðuni.

Pedal-endurskin: Endurskin skulu vera á pedalunum, bæði aftan og framman.
Endurskin aftan og framman: Eitt reytt endurskin skal vera aftan á súkkluni. Framman skal endurskinið vera hvítt.
Endurskin á hjólunum: Gult endurskin skal vera á snælduni á báðum hjólum. Tú kanst í staðin hava hvíta endurskinsstrípu á dekkunum ella á felgunum.
Ringiklokka: Ringiklokka skal vera á róðrinum, og hon skal ringja hart.
Lás: Súkklan skal hava góðkent lás.
Bremsur: Bremsur eiga at vera á báðum hjólum. Antin tvær hondbremsur ella ein hondbremsa og ein fótbremsa.
Súkkluhjálmur: Mælt verður til altíð at brúka hjálm.

Riggar súkklan enn, sum hon skal, tá tú tekur hana fram eftir veturin?

Vaska súkkluna: Vaska hana, smyr ketuna og lat olju á gir og bremsur.
Kanna bremsurnar: Er mynstrið á bremsukubbunum slitið, eiga teir at verða skiftir út.
Dekk: Eru rivur á dekkunum? Slitin dekk, har mynstrið næstan er vekk, skulu skiftast út.

Hevur tú viðførið við tær á súkkluni, eigur tað í mesta lagi at vera tríggjar metrar langt og/ella ein metur breitt.

Súkkla ikki við lutum, sum forða tær at geva tekin og stýra trygt.
Hong ikki viðføri á róðrið. Viðførið kann koma inn í hjólið og ávirka trygdina. Brúka heldur kurv ella súkklutasku.
Skilagott er at seta eina frakkaverju á bakhjólið á súkkluni, so klæðir og viðføri ikki koma inn í hjólið.